Թուրքիան ՆԱՏՕ-ի կարևոր դաշնակիցն է. Գերմանիայի ՊՆ ղեկավար

Թուրքիան ՆԱՏՕ-ի կարևոր դաշնակիցն է․ փետրվարի 2-ին իր թուրք գործընկերոջ հետ հանդիպումից առաջ ասել է Գերմանիայի պաշտպանության նախարար Աննեգրեթ Կրամպ-Կարենբաուերը:

Նա Գերմանիայի պաշտպանության նախարարության կենտրոնակայանում ընդունել է Թուրքիայի ազգային պաշտպանության նախարար Հուլուսի Աքարին՝ երկկողմ պաշտպանական համագործակցության տարբեր ասպեկտների, միջազգային անվտանգության հարցերի և Արևելյան Միջերկրական ծովի վերջին զարգացումների շուրջ բանակցությունների համար. գրում է Hurriyet- ը:

«Թուրքիան ՆԱՏՕ-ի կարևոր գործընկերն է և այդպիսին էլ կմնա, և այսօր դժվար թեմաներ կլինեն օրակարգում»,- նշվում է նախարարության թվիթերյան էջում:

Նախատեսվում է, որ նախարարները կքննարկեն ժամանակակից հարցերի լայն շրջանակ՝ ներառյալ ահաբեկչության դեմ պայքարը, Աֆղանստանում և Իրաքում ՆԱՏՕ-ի առաքելությունները, Սևծովյան տարածաշրջանի զարգացումները և Արևելյան Միջերկրական ծովի իրադրությունը:

Աքարի այցը հաջորդել է Թուրքիայի և Հունաստանի միջև բանակցությունների վերսկսմանը`Էգեյան ծովում և Արևելյան Միջերկրական ծովում ծովային սահմանների վերաբերյալ երկկողմ խնդիրների և ծագած վեճերի շուրջ:

Վերջին ամիսներին Գերմանիայի կառավարությունը մի շարք նախաձեռնություններ է ձեռնարկել Անկարայի և Աթենքի միջև լարվածությունը թուլացնելու ուղղությամբ և փորձել հեշտացնել ՆԱՏՕ-ի անդամ երկու երկրների միջև դիվանագիտական լուծմանն ուղղված բանակցությունները: