Անհրաժեշտ է ուժեղացնել միջազգային ճնշումն Ադրբեջանի վրա. Էդմոն Մարուքյան

Հայկական կողմը պետք է աշխատի Ադրբեջանի վրա միջազգային ճնշման ուժեղացման եւ կոնսոլիդացման ուղղությամբ: Այս մասին փետրվարի 2-ին Ազգային ժողովում լրագրողներին ասաց ԵԽԽՎ-ում հայկական պատվիրակության անդամ, «Լուսավոր Հայաստան» կուսակցության եւ դրա խորհրդարանական խմբակցության ղեկավար Էդմոն Մարուքյանը:

Ընդ որում՝ պատգամավորը խոստովանեց, որ ԵԽԽՎ-ում արդեն հոգնել են ղարաբաղյան խնդրից: «Բանն այն է, որ մարդիկ տեսնում են, որ պատերազմն ավարտվել է, կա ստորագրված փաստաթուղթ: Բայց կա մի երկիր, որը, չնայած այդ ամենին, իրեն ահաբեկչական պետության պես է պահում: Միայն ահաբեկիչն է պատանդներ պահում եւ փորձում այդպիսով իր պայմանները թելադրել, ինչի մասին ես հստակ ասել եմ ԵԽԽՎ-ում ունեցած իմ ելույթի ժամանակ: Կա՛մ Բաքուն վերադարձնում է մեր գերիներին, կա՛մ Ադրբեջանն ահաբեկչական պետություն է հայտարարվում»,- կոչ արեց Մարուքյանը, որը, այնուամենայնիվ, հաջողության չհասավ ԵԽԽՎ-ում: