Խամենեին արգելել է COVID-19 պատվաստանյութերի ներմուծումը Մեծ Բրիտանիայից և ԱՄՆ-ից

Իրանի գերագույն հոգևոր ղեկավար Ալի Խամենեին արգելել է կորոնավիրուսի պատվաստանյութերը Մեծ Բրիտանիայից և ԱՄՆ-ից:

«Կորոնավիրուսի հետ կապված երկրորդ կետը. բրիտանական և ամերիկյան պատվաստանյութերի ներմուծումն արգելված է: Եթե ամերիկացիներին հաջողվեր պատվաստանյութ ստեղծել, կորոնավիրուսի հետ կապված այդքան ամոթալի իրավիճակ չէր լինի»,- ասել է նա հեռուստաելույթում:

Խամենեին նշել է, որ նույն իրավիճակն է Մեծ Բրիտանիայում`վկայակոչելով COVID-19-ից բարձր մահացությունը:

«Նրանց նկատմամբ վստահություն չկա: Որոշ դեպքերում նրանք ցանկանում են պատվաստանյութը փորձարկել ուրիշների վրա, ստուգել` արդյո՞ք այն գործում է, թե՞ ոչ», - հավելել է նա` նշելով, որ Ֆրանսիայի նկատմամբ նույնպես լավատես չէ:

Միաժամանակ, Իրանի գերագույն առաջնորդի խոսքով, եթե այլ երկրներում կա պատվաստանյութ, որին կարելի է վստահել, ապա դրա գնման հետ կապված խնդիրներ չեն առաջանա:

Նշենք, որ Իրանը սեփական արտադրության «Կովո–Իրան» պատվաստանյութ է մշակում, որը նախատեսվում է ստանալ գարնանը։