Թուրքիայում ձերբակալել են ռուսական НТВ-ի 2 լրագրողի՝ Bayraktar կազմակերպության մոտակայքում. երկրի ԱԳՆ-ն պարզաբանել է

Ռուսական НТВ հեռուստաընկերության լրագրողներին Ստամբուլում ձերբակալել են հավատարմագրման բացակայության համար: Այդ մասին ուրբաթ ՏԱՍՍ-ին հայտնել է Թուրքիայի արտաքին գործերի նախարարության աղբյուրը:

«Նրանց ոստիկանության աշխատակիցները բերման են ենթարկել նկարահանումներ կատարելու պահին: Ստուգման ընթացքում պարզվել է, որ նրանք նկարահանելու թույլտվություն չունեն»,- ասել է գործակալության զրուցակիցը:

Աղբյուրը նաև նշում է, որ Թուրքիայի ոստիկանության աշխատակիցները լրագրողներին բերման են ենթարկել այն շենքի մոտ, որտեղ տեղակայված է «Բայքար Սավունմա» ընկերությունը, որը մասնագիտանում է թուրքական ռազմական անօդաչու թռչող սարքերի (ԱԹՍ) արտադրության մեջ:

«Նրանք բերման են ենթարկվել «Բայքար Սավունմա» ընկերության մերձակայքում նկարահանելիս»,- ասել է աղբյուրը:

Թուրքիայի արտգործնախարարությունը հավելել է, որ իրենք տեղեկություններ չունեն, թե ոստիկանության որ բաժանմունք են տարել հեռուստաընկերության աշխատակիցներին: