Թրամփի խորհրդականը կայցելի Սաուդյան Արաբիա և Քաթար՝ երկու երկրներին հաշտեցնելու համար. ԶԼՄ–ներ

ԱՄՆ նախագահ Դոնալդ Թրամփի ավագ խորհրդական և փեսա Ջարեդ Քուշները շուտով կմեկնի Սաուդյան Արաբիա և Քաթար՝ Դոհային Պարսից ծոցի երկրների հետ հաշտեցնելու համար:

Ամերիկյան կողմի կարծիքով՝ կարգավորումը կվերադարձնի տարածաշրջանի կայունության զգացումը և կդառնա ներկայիս ամերիկյան վարչակազմի ձեռքբերումներից մեկը՝ մինչև հունվարի 20-ին նախագահական փոփոխությունները: Հոդվածում նշվում է, որ ԱՄՆ-ը սերտ կապեր է պահպանում ինչպես Քաթարի, այնպես էլ նրա հակառակորդների հետ, սակայն վարչակազմի՝ կողմերին հաշտեցնելու նախորդ փորձերն անհաջող են եղել:

Քուշները կհանդիպի Սաուդյան Արաբիայի թագաժառանգ արքայազն Մոհամմադ բեն Սալման ալ Սաուդի և Քաթարի էմիր շեյխ Թամիմ բին Համադ ալ Թանիի հետ: ԱՄՆ պատվիրակության կազմում կլինեն նաև միջազգային բանակցություններում հատուկ բանագնաց Ավի Բերկովիցը և Իրանի հարցով նախկին հատուկ ներկայացուցիչ Բրայան Հուքը, որոնք կմասնակցեն անձնական հիմունքներով:

Քուշները շահագրգռված է վերահաստատել ավելի վաղ ձեռք բերված պայմանավորվածությունները իսրայելական ինքնաթիռներին Սաուդյան Արաբիայի օդային տարածքն օգտագործելու թույլտվության վերաբերյալ: