Պուտինը մի շարք հանդիպումներ կանցկացնի զինված ուժերի ղեկավարության հետ

Ռուսաստանի նախագահ Վլադիմիր Պուտինը հաջորդ շաբաթ մի շարք հանդիպումներ կանցկացնի Զինված ուժերի ղեկավարության եւ երկրի պաշտպանական համալիրի հետ. այս մասին տեղեկացնում է vesti.ru կայքը:

Մասնավորապես, նշվում է՝ վերջին տարիներին, այդ թվում` նման հանդիպումների արդյունքում, ռուսական բանակը նոր տեսակի զենքերով հագեցվածությամբ պատմության մեջ առաջին անգամ առաջ անցավ բոլորից: Բացի այդ, այս հանդիպումների ժամանակ փակ դռների հետևում քննարկվում են պաշտպանական գործարանների ներուժի օգտագործման եւ քաղաքացիական արտադրանքի արտադրության տարբերակները:

ԶԼՄ-ն մանրամասնում է նաև, որ հաջորդ շաբաթ նախագահը կմասնակցի Շանհայի համագործակցության կազմակերպության երկրների գագաթնաժողովին, որը պետք է անցկացվեր Սանկտ Պետերբուրգում, սակայն համավարակի պատճառով կանցկացվի հեռավար կարգով:

Միևնույն ժամանակ ՌԴԴ նախագահի ժամանակացույցում ներառված է նաև մասնակցությունը Ռազմավարական նախաձեռնությունների գործակալության ֆորումին: