Պուտինը մի շարք հանդիպումներ կանցկացնի զինված ուժերի ղեկավարության հետ

Ռուսաստանի նախագահ Վլադիմիր Պուտինը հաջորդ շաբաթ մի շարք հանդիպումներ կանցկացնի զինված ուժերի ղեկավարության և երկրի պաշտպանական համալիրի հետ. հայտնում է vesti.ru կայքը:

Նշվում է, որ վերջին տարիներին, այդ թվում՝ նման հանդիպումների արդյունքում, պատմության մեջ առաջին անգամ ռուսական բանակը բոլորից առաջ է անցել նոր տեսակի սպառազինության հագեցվածությամբ: Բացի այդ՝ այս հանդիպումների ժամանակ փակ դռների հետևում քննարկվում են պաշտպանական գործարանների ներուժի օգտագործման և քաղաքացիական արտադրանքի արտադրության տարբերակները:

Կայքը նաև հաղորդում է, որ հաջորդ շաբաթ նախագահը կմասնակցի Շանհայի համագործակցության կազմակերպության երկրների գագաթնաժողովին, որը պետք է անցկացվեր Սանկտ Պետերբուրգում, բայց համաճարակի պատճառով կանցկացվի հեռակա կարգով: Նախագահի ժամանակացույցը ներառում է նաև մասնակցություն Ռազմավարական նախաձեռնությունների գործակալության ֆորումին: