Ես Ադրբեջանի ԱԳՆ-ին հնարավորություն էի տվել բացատրելու, թե ինչու են սիրիացի ահաբեկիչները կռվում Արցախում. հույն լրագրող

Ավստրալիայում Ադրբեջանի դեսպանատունը կապ է հաստատել է հույն լրագրող Պոլ Անտոնոպուլոսի հետ այն բանից հետո, երբ Արցախյան հակամարտության վերաբերյալ ուսումնասիրություն է հրապարակվել հունական Greek City Times-ում: Այս մասին հայտարարել է հույն վերլուծաբանը՝ զետեղելով դեսպանատան հետ խոսակցությունը:

Քանբերայում Ադրբեջանի դեսպանության ներկայացուցիչը փորձել է «համոզել» հույն վերլուծաբանին, որ ներկայացնի ադրբեջանական քարոզչությունը՝ պնդելով, որ Greek City Times-ում գրված հոդվածը «միակողմանի է»:

Երբ Անտոնոպուլոսը կտրականապես մերժել է ադրբեջանական քարոզչությամբ որևէ կերպ զբաղվելու առաջարկը, Ադրբեջանի դեսպանատունը որոշել է «ձեռք քաշել» վերլուծաբանից:

Անտոնոպուլոսը թվիթերյան իր միկրոբլոգում գրել է, որ ինքը հնարավորություն է տվել Ադրբեջանի արտաքին գործերի նախարարությանը ապացուցելու, որ Սիրիայից եկած ահաբեկիչները չեն մասնակցել Արցախի դեմ պատերազմին: Բայց այս ապացույցը, իհարկե, չի ներկայացվել:

«Ես ներողություն եմ խնդրում Ադրբեջանից, բայց ինձ չի հետաքրքրում լսել բռնապետ Իլհամ Ալիևի քարոզչական դրդապատճառները: Ես հնարավորություն տվեցի Ադրբեջանի ԱԳՆ-ին բացատրելու, թե ինչու են սիրիացի ահաբեկիչները կռվում Արցախում: Նրանք ինձ բացահայտ ստեցին», - գրել է Անտոնոպուլոսը: