Յուլիա Տիմոշենկոյի վիճակը ծանր է, նրան կորոնավիրոսուվ տեղափոխել են հիվանդանոց

Ուկրաինայի նախկին վարչապետ, «Բատկիվշչինա» կուսակցության առաջնորդ Յուլիա Տիմոշենկոն հիվանդացել է COVID-19-ով և գտնվում է ծանր վիճակում: «Եվրանյուզ»-ը հաղորդում է, որ այդ տեղեկությունը հաստատել է նրա մամուլի քարտուղար Մարինա Սորոկան: Նա նշել է, որ քաղաքական գործիչը բարձր ջերմություն ունի, բայց «պայքարում է»:

Յուլիա Տիմոշենկոն 59 տարեկան է: Անցյալ տարի կայացած նախագահական ընտրություններում քվեների ավելի քան 13%-ով նա երրորդ տեղում էր: Ուկրաինայում COVID-19 համաճարակի բռնկման սկզբից նա քննադատել է կորոնավիրուսի դեմ պայքարի կառավարության միջոցները, հայտարարելով, որ պաշտոնական վիճակագրությունը ցույց չի տալիս վարակի տարածման իրական չափը և հայրենակիցներին հորդորել է թեթև չվերաբերվել համաճարակին:

Մայիսին, երբ կորոնավիրուս հայտնաբերվեց «Բատկիվշչինա»-ի պատգամավորներից մեկի՝ Օլեգ Մեյդիչի մոտ, ամբողջ խմբակցությունը, ներառյալ Տիմոշենկոն, COVID-19-ի թեստեր հանձնեցին և մեկ շաբաթով կարանտինի անցան: