Գիտնականները հայտնաբերել են կորոնավիրուսը չեզոքացնող 28 հակամարմին

Քյոլնի համալսարանական հիվանդանոցի և Վարակների հետազոտության գերմանական կենտրոնի մի խումբ գիտնականների հաջողվել է առանձնացնել  28 հակամարմին, որոնք մեծ հավանականությամբ կարող են չեզոքացնել կորոնավիրուսը. տեղեկացնում է Yerkir.am-ը` ՌԻԱ «Նովոստի»-ին հղումով:

«Մենք նախատեսում էինք մանրամասն ուսումնասիրել օրգանիզմի իմունային պատասխանը վարակին և  միաժամանակ գտնել հակամարմիններ, որոնք կարող են կիրառվել COVID-19-ը բուժելիս»,- ասել է նախագծի ղեկավար Ֆլորիան Քլյայնը:

Նրա խոսքով` հետազոտողների հայտնաբերած հակամարմինները կապում են պաթոգենի սպիտակուցը և խոչընդոտում վիրուսի ներթափանցմանը առողջ բջիջներ: Իսրայելցի գործընկերների հետ գերմանացի գիտնականներն ուսումնասիրել են արյան ավելի քան 4000 B-բջիջներ` վերցված նոր տիպի կորոնավիրուսով վարակված ու կազդուրված 12 պացիենտից: Արդյունքում` հետազոտողները մասնակի  բացահայտել են հակամարմինների առաջացման մեխանիզմը, վերարտադրել այն լաբորատորիայում և ստուգել այդ սպիտակուցների ակտիվությունը կորոնավիրուսի դեմ պայքարում:

Ներկայումս մասնագետները Boehringer Ingelheim դեղագործական ընկերության հետ համատեղ ուսումնասիրում են հակամարմինների բնութագրերը: Հավանորեն, կլինիկական հետազոտությունները կսկսվեն այս տարի: Գիտնականները ենթադրում են, որ վիրուսը չեզոքացնող հակամարմինները կարող են գործել մի քանի շաբաթ և այդ ժամանակահատվածում պաշտպանել մարդուն հիվանդությունից: