Ադրբեջանի քաղաքացիները Դաղստանում հարձակվել են ոստիկանության վրա

Չորս ոստիկաններ վիրավորվել են Դաղստանի Դերբենդի շրջանում տեղի ունեցած անկարգությունների ընթացքում, որոնք կազմակերպվել էին Ադրբեջանի քաղաքացիների կողմից: Այս մասին հունիսի 16-ին հայտարարել է շրջանի ղեկավարի պաշտոնակատար Ֆուադ Շիխիևը. փոխանցում է ՏԱՍՍ-ը:

Ըստ նրա՝ հարևան հանրապետության քաղաքացիները պահանջել են թույլ տալ նրանց անցնել ռուս-ադրբեջանական սահմանը: Ադրբեջանի քաղաքացիների ճամբարը գտնվում է Դերբենդի շրջանի Կուլար գյուղի մոտակայքում:

Շիխիևը նշել է, որ չարտոնված ճամբարում բախումից հետո բոլոր վիրավորված ոստիկանները հոսպիտալացվել են: Իրավախախտները վնասել են նաև ծառայողական մեքենան: «Ներկայումս բախումները դադարել են, բռնարարներին տեղափոխել են ոստիկանության բաժին», - ասել է շրջանի ղեկավարը:

Նշենք, որ Ադրբեջանի քաղաքացիները սպասում են սահմանի բացմանը, որը փակվել էր համաճարակի պատճառով: Սահմանը հատելու համար անձանց ցուցակը ձևավորում է ադրբեջանական կողմը: Հունիսի 15-ի երեկոյան ճամբարի բնակիչները վրդովված էին նոր ցուցակում իրենց անունների բացակայությունից: