2020 թ. Բաքվում Ֆորմուլա-1-ի գրան պրի չի անցկացվի

Ֆորմուլա 1-ում պաշտոնապես չեղյալ է հայտարարվել Ադրբեջանի, Սինգապուրի և Ճապոնիայի գրան պրիները: Այս փուլերը չեն լինի 2020-ի մրցաշրջանի երկրորդ կեսին:

«COVID-19- ի տարածման հետևանքով առաջացած դժվարությունների արդյունքում մենք և մեր Ադրբեջանում, Սինգապուրում և Ճապոնիայում գտնվող գործընկերները որոշեցինք չեղարկել 2020 թվականին մրցավազքը», - ասված է «Ֆորմուլա 1» -ի հայտարարության մեջ: Որոշումը կայացվել է տվյալ երկրներում վարակով պայմանավորված իրավիճակի հետ։

Նշենք, որ Բաքվի և Սինգապուրի գրան պրիները քաղաքային են, հետևաբար դրան նախապատրաստվելը մեծ ժամանակ և ռեսուրսներ է խլում, ինչը համավարակի պայմաններում էլ ավելի է բարդացրել դրանց անցկացման հավանականությունը։ Իսկ Ճապոնիան դեռևս չի վերացրել երկիր մուտք գործելու արգելքները։

Նշենք, որ մարտ ամսին պետք է սկսվեր 2020 թ. մրցաշրջանը, սակայն համավարկի հետևանքով մեկը մյուսի հետևից երկրները հայտարարում էին մրցավազքերի չեղարկման մասին։ Մրցաշրջանը կսկսվի Ավստրիա գրան պրիով, կունենա 15-18 գրան պրի և կշարունակվի մինչև դեկտեմբեր ամիս։