Կորոնավիրուսի պատճառով աշխատանքային միգրացիայի վերաբերյալ ՌԴ օրենսդրության մեջ փոփոխություններ չեն եղել. Լավրով

Կորոնավիրուսային վարակի պատճառով աշխատանքային միգրացիայի վերաբերյալ ռուսաստանյան օրենսդրության մեջ փոփոխություններ չեն եղել. ըստ yerkir.am-ի` այսօր` մայիսի 13-ին  Շանհայի համագործակցության կազմակերպության արտգործնախարարների խորհրդի տեսակապով նիստից հետո հայտարարել է  ՌԴ արտգործնախարար Սերգեյ Լավրովը: 

«Մեր կողմից որևէ փոփոխություն աշխատանքային միգրացիայի կիրառման մոտեցման մեջ չկա: Ես չեմ լսել որևէ փոփոխության մասին ՇՀԿ մեր գործընկերների մոտեցումներում ու օրենսդրության մեջ»,- Լավրովի խոսքերն է մեջբերում EADaily-ն:

Ըստ նրա` ռուսաստանյան կառավարությունը չի խնդրել միգրանտներին` լքել երկիրը` կորոնավիրուսով պայմանավորված: Ավելին` մի շարք միջոցառումներ է իրականացրել բյուրոկրատական  ընթացակարգերը մեղմելու համար, օրինակ` երկրարացրել է աշխատանքի և արտոնագրերի ստացման թույլտվությունը:

«Անձանց միակ խումբը, որը ցանկացել ենք հայրենիք ուղարկել, ՌԴ տարածքում իրենց կացության ռեժիմի կոպիտ խախտումներ անողներն են: Նրանց թիվն այնքան էլ մեծ չէ, և մենք հետզհետե նրանց տներով ենք ուղարկում` մեր հարևան երկրները»,- ասել է ՌԴ արտգործնախարարը: