Ուկրաինայի կառավարությունը Ռադայից հետ է կանչել Սաակաշվիլիին փոխվարչապետ նշանակվելու վերաբերյալ առաջարկությունը

Ուկրաինայի կառավարությունը Գերագույն ռադայից  հետ է կանչել Միխեիլ Սաակաշվիլիին բարեփոխումների գծով փոխվարչապետ նշանակվելու վերաբերյալ առաջարկությունը. այս մասին ֆեյսբուքյան իր էջում գրել է «Censor.NET»-ի գլխավոր խմբագիր Յուրի Բուտուսովը, գրում է Gruzia Online-ը։

Նա, մասնավորապես, նշել է.

«Միխեիլ Սաակաշվիլիի նշանակումը «Ժողովրդի ծառան» խմբակցությունում արգելափակվել է: Երկար բանակցություններից հետո խմբակցությանը հաջողվել էր 248 պատգամավորներից հավաքել շուրջ 140-170 ձայն հօգուտ Սաակաշվիլիի, մինչդեռ կուսակցական չաթում  շփման ընթացքում միայն 100-ից ավելի պատգամավոր հայտարարեց հրապարակավ քվեարկելու պատրաստակամության մասին», ու հավելել՝ աջակցող ձայներ չկան այն պատճառով, որ նախագահ Վլադիմիր Զելենսկին Սաակաշվիլիին հրապարակավ սատարելու ցանկություն չունի:

Միևնույն ժամանակ, Բուտուսովը հստեկեցրել է, որ այժմ առաջ է քաշվում Օդեսայում Սաակաշվիլիին քաղաքապետի ընտրություններում առաջադրելու տարբերակը՝ իշխանության քաղաքական ու  ֆինանսական առավելագույն աջակցությամբ: