Ռուսաստանը պատրաստ է Ադրբեջանի հետ բանակցել ռազմական ինքնաթիռների մատակարարման շուրջ

Ռուսաստանը պատրաստ է Ադրբեջանի հետ բանակցությունների՝ զինատեսակների լայն տեսականու՝ այդ թվում ավիացիոն տեխնիկայի մատակարարման շուրջ։ Այս մասին Yerkir.am-ը տեղեկանում է Ռուսաստանի Ռազմատեխնիկական համագործակցության դաշնային ծառայությունից։

ՌԴՀՏԾ-ի պաշտոնական ներկայացուցիչ Մարիա Վորոբևան հայտարարել է, որ Ադրբեջանը ռազմատեխնիկական համագործակցության ոլորտում համարվում է Ռուսաստանի գործընկերը, այդ իսկ պատճառով Մոսկվան պատրաստ է Բաքվի հետ բանակցությունների՝ ռուսական սպառազինության և ռազմական տեխնիկայի մատակարարման համար։

Ադրբեջանի ՊՆ-ն օրերս հայտարարել է ռուսական Միգ-35 և Սու-35 կործանիչների հանդեպ հետաքրքրության մասին։ Ադրբեջանական գերատեսչության ներկայացուցիչներն արդեն այցելել են «Սուխոյ» կազմակերպության և «Միգ»-ի արտադրամասեր։

Դեռևս 2019 թ. Ադրբեջանի նախագահ Իլհամ Ալիևը հայտարարել էր ռազմատեխնիկական ոլորտում ՌԴ-ի հետ 5 մլրդ դոլարի պայմանագիր կնքելու մասին, որից 3 մլրդն արդեն իրականացվել է։