Իրաքում կոալիցիայի ռազմակայանի հրետակոծության հետևանքով վիրավորվել է 5 մարդ

«Իսլամական պետություն» խմբավորման դեմ պայքարող՝ ԱՄՆ-ի ղեկավարած կոալիցիան հաստատել է Իրաքում իր ռազմաբազայի նոր հրետակոծության փաստը, որի հետևանքով տուժել է 5 մարդ. տեղեկացնում է yerkir.am-ը՝ ՌԻԱ «Նովոստի»-ին հղումով:

«Կոալիցիան հաստատում է, որ մարտի 14-ին՝ 10:51-ին, առնվազն 25 107 միլիմետրանոց հրթիռ է ընկել իրաքյան Թաջի ճամբարի վրա, որտեղ տեղակայված են կոալիցիայի զորքերը: Կոալիցիայի 3 զինծառայող  և 2 իրաքցի վիրավոր են»,- թվիթերյան իր էջում հայտնել է կոալիցիայի պաշտոնական ներկայացուցիչ, գնդապետ Մայլս Քեգինսը:

Իր հերթին, Իրաքում համատեղ ռազմական գործողությունների հրամանատարության ներկայացուցիչ գեներալ Թահսին ալ Հաֆաջին Իրաքի լրատվական գործակալությանը հայտնել է, որ Թաջի ռազմակայանի ուղղությամբ արձակվել է 33 ռեակտիվ արկ: Նա նաև ընդգծել է, որ ամերիկյան զորքերը չեն կարող պատասխան տալ հարձակմանը առանց իրաքյան բանակի հրամանատարության թույլտվության:

Սա Թաջի ռազմաբազայի երկրորդ հրետակոծությունն է մեկ շաբաթվա ընթացքում: Նախորդի ժամանակ զոհվել էին 2 ամերիկացի և 1 բրիտանացի զինծառայողներ: Հրետակոծության պատասխանատվությունը ԱՄՆ-ը դրել էր Իրաքի շիա խմբավորումների վրա: