Իրանում կորոնավիրուսից մահացել է երկրի բարձրագույն ղեկավարի խորհրդատվական մարմնի անդամներից մեկը

Իրանցի պաշտոնյա, երկրի բարձրագույն ղեկավարի խորհրդատվական մարմնի անդամ Մոհամմադ Միրմոհամմադին մահացել է կորոնավիրուս. հայտնում է Yerkir.am-ը՝ ISNA լրատվական գործակալությանը հղումով:

Նշվում է՝ 72-ամյա Միրմոհամմադիի մոտ կորոնավիրուս էր ախտորոշվել 1 շաբաթ առաջ: Նա հոսպիտալացվել էր, բայց նրա կյանքը փրկել չի հաջողվել:

Ավելի վաղ տեղեկացրել էինք՝ իրանցի պաշտոնյաներից կորոնավիրուս է հայտնաբերվել նաև երկրի փոխնախագահի, առողջապահության նախարարի, ինչպես նաև 5 պատգամավորի մոտ: ԶԼՄ-ների տեղեկություններով՝ պատգամավորներից մեկը ևս մահացել է:

Վերջին տվյալներով՝ Իրանում կորոնավիրուսը 54 մարդու կյանք է խլել, վարակվել՝ 978-ը:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին: