Վրացի դիտորդները գովաբանում են Ադրբեջանում անցկացված «ժողովրդավար» ընտրությունները

Ադրբեջանում խորհրդարանական ընտրություններն անցել են հանգիստ մթնոլորտում: Այս մասին, ըստ Yerkir.am-ի, «Թրենդ» ադրբեջանական գործակալությանը հայտնել է վրացական MTAVARI մեդիա կենտրոնի հիմնադիր և տնօրեն Էկա Գուլուան:

«Առավոտյան ութից ես այցելել եմ 7-8 ընտրատեղամաս: Ժողովուրդը հանգիստ քվեարկել է, բոլորը ուրախ էին: Բոլորն ասում են, որ գոհ են կառավարությունից»,- ասել է նա:

Ըստ նրա՝ նա երբևէ չի տեսել այդպիսի ժողովրդավարական ընտրական միջավայր:

Վրաստանի ադրբեջանցիների ազգային կոնգրեսի (ԳԱՄԿ) նախագահ Ալի Բաբաևն իր հերթին նշել է, որ Ադրբեջանի կադրային քաղաքականությունը վերջերս էականորեն փոխվել է, երիտասարդները կառավարման մեջ ավելի ակտիվ մասնակցություն են ունենում և անհրաժեշտ էր փոփոխություններ կատարել խորհրդարանի կազմում:

«Առայժմ որևէ ընտրախախտում տեղի չի ունեցել ո՛չ նախընտրական քարոզչության, ո՛չ էլ ընտրությունների ժամանակ: Այսօր մենք այցելել ենք մոտ 10 ընտրատեղամաս և շարունակում ենք մեր դիտարկումները», - ասել է նա:

Նրա խոսքով՝ առավոտյան, ցուրտ եղանակի պատճառով, ավելի քիչ ընտրող է եղել, բայց կեսօրից հետո նրանց թիվն ավելացել է:

«Մոտ 15 լրագրողներ ներկա են Վրաստանից, այդ թվում՝ Վրաստանի խորհրդարանի անդամներ, Վրաստանի Կենտրոնական ընտրական հանձնաժողովի ներկայացուցիչներ: Ադրբեջանի համար նման ժողովրդավարական, թափանցիկ ընտրություններ անցկացնելը մեծ հաղթանակ է, այն կնպաստի երկրի ավելի մեծ բարեկեցությանը», - ասել է Բաբաևը:

Հիշեցնենք, որ երեկ՝ փետրվարի 9-ին, Ադրբեջանում անցկացվել է Միլի Մեջլիսի (խորհրդարանի) վեցերորդ գումարման արտահերթ ընտրությունները:

Ընտրություններին մասնակցելու համար գրանցվել է 1314 թեկնածու:

246 մարդ առաջադրվել է 19 քաղաքական կուսակցությունների կողմից, 1057-ը`անհատապես, 11-ը` նախաձեռնող խմբերի կողմից: Կանայք կազմում են թեկնածուների 21 տոկոսը, տղամարդիկ ՝ 79:

Երկրի 125 ընտրատարածքներում գործում է 5573 մշտական ընտրատեղամաս:

Որպես ընտրող գրանցված է 5 329 460 մարդ: 

883 միջազգային և 77.790 տեղական դիտորդներ հետևում են քվեարկության գործընթացին: Տեղական դիտորդներից 35152-ը քաղաքական կուսակցությունների ներկայացուցիչներ են: Միջազգային դիտորդները ներկայացնում են 58 երկիր և 59 կազմակերպություններ:

Հիշեցնենք, որ ավելի վաղ Yerkir.am-ը տեղեկացրել էր Ադրբեջանում տեղի ունեցած ընտրություններում գրանցված ակնհայտ խախտումների ու բռնությունների մասին: