Ինձ մոտ տպավորություն է ստեղծվել, թե այս երկրում բոլոր կոռուպցիոներներին բռնել են...

Հայկ Մարությանի անունը վերջերս շրջանառվեց նաև քաղաքապետի պաշտոնն ու ՍՊԸ-ի ղեկավար լինելն օրենքի խախտմամբ  համատեղելու մասին տեղեկություններում: Yerkir.am-ը հաղորդում է, որ Հայկ Մարությանի դեմ նաև վարույթ է հարուցվել: «Այստեղ երկու կոմպոնենտ կա, մեկը կապված է լրատվամիջոցների, մյուսը՝ կոռուպցիայի կանխարգելման  հանձնաժաղովի հետ: Հրապարակված տեղեկությունը նույն օրը փաստաթղթերով հերքվեց, այնումանայնիվ, հանձնաժողովը վարույթ է հարուցել:  Այդքան ռեսուրս, պետական գումար է ծախսվել, մինչդեռ կարելի էր 3000 դրամ վճարել և պետռեգիստրով տեսնել, որ ես մինչև քաղաքապետ դառնալն  այլևս այդ ընկերության տնօրեն չեմ հանդիսացել: Եթե այդ 3000 դրամը չկա, ես պրեմիա  չեմ ստանում, բայց 400.000 դրամ աշխատավարձ եմ ստանում, պատրաստ եմ իմ աշխատավարձից այդ 3000  դրամը տրամադրել այդ կառույցին, որպեսզի նրանք պետռեգիստրով նայեին: Ճիշտն ասած՝ ես դա ուզում էի անել, բայց մտածեցի՝ կարող է էդ 3000 դրամը կաշառք համարեն ու հիմա էլ դրա համար վարույթ հարուցեն»,- պատմեց Հայկ Մարությանը:

Քաղաքապետի մոտ տպավորություն է ստեղծվել, թե բոլոր կոռուպցիոներներին մեր երկրում բռնել են, բոլորը նստած են, հիմա զբաղված են այսպիսի հարցերով: Սա համարո՞ւմ է արդյոք իր անձի նկատմամաբ միտում, քաղաքապետը պատասխանել է. «Կոնկրետ այդ կառույցի ղեկավարին ներկայացրել է «Լուսավոր Հայաստան» կուսակցությունը, ես չեմ ուզում միտում տեսել, բայց փաստն արձանագրում եմ»:  

Հ.Գ.

Երևանի քաղաքապետարանի կոմունալ տնտեսության վարչության պետ Արարատ Խաչիկյանն իր դիմումի համաձայն ազատվել է աշխատանքից: Հայկ Մարությանը չմանրամասնեց, թե որն է նրա՝ աշխատանքից ինքնակամ ազատվելու պատճառը: Հիշեցնենք, Դավիթ Խաժակյանն էր տեղեկություն տարածել, որ Արարատ Խաչիկյանի քրոջ որդին է շահել քաղաքապետարանի հերթական տենդերներից մեկը: