Թուրքիան և ԱՄՆ-ն նոր պայմանագիր են կնքել Ինջիրլիքի ռազմաբազայի վերաբերյալ

Պենտագոնը թուրքական մի շարք կազմակերպությունների հետ պայմանագիր է կնքել՝ Թուրքիայում գտնվող Ինջիրլիք ռազմաբազայում (Ադանայի նահանգ) շինարարական աշխատանքներ անցկացնելու վերաբերյալ, մինչև 2024 թ.՝ ընդհանուր 95 մլն. դոլար գումարով: Այս մասին, ըստ Yerkir.am-ի, հայտնում են ԱՄՆ-ի ՊՆ մամլո քարտուղարությունից:

«Թուրքական ութ կառուցապատող ընկերության հանձնվել է ընդհանուր 95 մլն. դոլար արժողությամբ պայմանագիր, որով նախատեսվում է Թուրքիայում ԱՄՆ Ռազմաօդային ուժերի ռազմաբազայում իրականացնել ռազմական նշանակության շինարարություն: Աշխատանքները ավարտին կհասցվեն 2024 թ. դեկտեմբերի 31-ին», - նշված է Պենտագոնի հայտարարության մեջ:

Այս պահին Ինջիրլիքում տեղակայված է 39-րդ ռազմաօդային էսկադրիլիան:

Թուրքիայի նախագահ Ռեջեփ Թայիփ Էրդողանն ավելի վաղ հայտարարել էր, որ Թուրքիան հնարավոր է փակի Ինջիրլիքի ավիաբազան ԱՄՆ-ի համար, եթե ԱՄՆ-ն ռուսական Ս-400 ՀՕՊ համակարգեր գնելու համար պատժամիջոցներ սահմանի Թուրքիայի նկատմամբ: