«Ծերո՛ւկ, հեռացի՜ր»․ Ղազախստանում Նազարբաևի դեմ բողոքի ակցիաներ են

Ղազախստանի մի քանի քաղաքներում չարտոնված բողոքի ցույցեր են անցկացվել, որոնց ժամանակ պահանջներից մեկն եղել է երկրի առաջին նախագահ, այս պահին ավելի լայն իրավասություններով օժտված ԱԱԽ ղեկավար Նուրսուլթան Նազարբաևի հեռանալը. ըստ Yerkir.am-ի՝ հայտնում է Reuters-ը: 

Նշվում է՝ բողոքի ակցիաները նվիրված են եղել երկու հիշարժան իրադարձությունների՝ 1986 թվականին Ղազախստանում Կրեմլի դրածոյի դեմ բռնությամբ ճնշված ցույցերին և 2011 թվականին նավթագործների գործադուլի բռնաճնշման գործողություններին, որոնց ժամանակ սպանվել են տասնյակ մարդիկ:

Հավելվում է՝ այս անգամվա բողոքի ակցիայի մասնակիցների պահանջները վերաբերում են օրվա իրավիճակի հետ, երբ հրաժարականից հետո դարձյալ երկիրը ղեկավարում է Նազարբաևը։

Բողոքի ակցիայի մասնակիցները անընդմեջ վանկարկումներ են հնչեցնում, այդ թվում՝ «Ղազախստանն առանց Նազարբաևի», «Ազատություն քաղբանտարկյալներին», «Դատել Նազաբաևին» և «Ծերո՛ւկ, հեռացի՜ր»։