Հետախույզ Գոհար Վարդանյանը հողին կհանձնվի Մոսկվայում՝ ամուսնու կողքին

Խորհրդային լեգենդար հետախույզ Գոհար Վարդանյանի հուղարկավորությունը, որը մեծ ավանդ ունի կարևոր տեղեկատվության ձեռք բերման գործում, որն անհրաժեշտ Էր ազգային շահերի և երկրի անվտանգության ապահովման համար, նոյեմբերի 29-ին տեղի կունենա Մոսկվայում Տրոեկուրովյան գերեզմանատանը. ըստ Yerkir.am-ի հայտնում է ՌԻԱ «Նովոստի»-ն: 

Գոհար Վարդանյանը հողին կհանձնվի իր ամուսնու ու զինակցի՝ Խորհրդային Միության հերոս Գևորգ Վարդանյանի կողքին: Գոհար Վարդանյանը մահացել Է նոյեմբերի 25-ին իր կյանքի 94-րդ տարում:

Գոհար Վարդանյանի մահվան կապակցությամբ խորին ցավակցություն է հայտնել Ռուսաստանի նախագահ Վլադիմիր Պուտինը:

«Գոհար Լևոնի Վարդանյանը պատկանում Էր փայլուն պրոֆեսիոնալների համաստեղությանը, որոնք իրենց կյանքը նվիրեցին Հայրենիքին ծառայելուն: Ամուսնու՝ Գևորգ Անդրեյի Վարդանյանի հետ միասին նրանք հիրավի բացառիկ ավանդ ներդրեցին մեր երկրի անվտանգության ամրապնդման գործում, վառ, հերոսական Էջեր գրեցին հայրենական արտաքին հետախուզության պատմության մեջ»,- նշված Է ՌԴ Արտաքին հետախուզության ծառայության կողմից ուղարկված պետության ղեկավարի հեռագրում: 

ԱՀԾ-ի տնօրեն Սերգեյ Նարիշկինը Գոհար Վարդանյանին համարել է հայրենական հետախուզության լավագույն աշխատակցուհիներից մեկը, կին, որը լեգենդ դարձավ դեռ կենդանության օրոք: Նարիշկինի համոզմամբ՝ Գոհար Վարդանյանը գործընկերների ու համախոհների հիշողության մեջ ընդմիշտ կմնա որպես «սրտաբաց, կենսուրախ, շռայլ հոգու տեր, անկեղծ ու խորապես օրինավոր մարդ»:

«Մենք չենք մոռանա այն, ինչ անլեգալ հետախուզության մեջ հասցրեց անել արտաքուստ փխրուն, բայց հոգով ուժեղ, արիակամ ու անձնուրաց այս կինը»,- ամփոփել Է ԱՀԾ-ի ղեկավարը: