ՆԱՏՕ-ի գլխավոր քարտուղարը դաշնակիցներին տարաձայնությունները հաղթահարելու կոչ է արել

ՆԱՏՕ-ի գլխավոր քարտուղար Յենս Ստոլտենբերգը դաշնակիցներին կոչ է արել «պատասխանատվություն ստանձնել» եւ տարբեր հարցերով տարաձայնությունները հաղթահարել, որ ապահովվի հավաքական անվտանգության ապահովման համար անհրաժեշտ միասնությունը, փոխանցում է «ՌԻԱ Նովոստի»-ն:

Գերմանիայում հետազոտական կենտրոնում ելույթ ունենալիս Ստոլտենբերգը նշել է, որ շատերն են հիմա խոսում դաշնակիցների միջեւ տարաձայնությունների մասին առեւտրի, էներգետիկայի, կլիմայի, Իրանի, ինչպես նաեւ Սիրիայի հյուսիս-արեւելքում իրավիճակի հարցերով: ՆԱՏՕ-ի գլխավոր քարտուղարի կարծիքով՝ «նորմալ է 29 ժողովրդավարությունների» միջեւ դիրքորոշումների տարբերությունը:

«Մենք անցյալում էլ ենք լուրջ տարաձայնություններ ունեցել... Բայց միշտ, վերջին հաշվով, հաջողվել է միավորվել մեր առանցքային խնդրի շուրջ՝ պաշտպանել միմյանց»,- ասել է նա: Հեռարձակումը կատարել է ՆԱՏՕ-ի մամուլի ծառայությունը:

Նա նշել է, որ «միշտ չի հեշտ լինում կոնսենսուսի հասնել», սակայն «մեր միասնությունն անհրաժեշտ է մեր հավաքական անվտանգության համար»:

«Այս պատճառով յուրաքանչյուր դաշնակցի ազգային շահերի շրջանակում է միասնական մնալը, մենք բոլորս պետք է պատասխանատվություն ստանձնենք մեր տարաձայնությունները հաղթահարելու այսօր, ինչպես եղել է նախկինում»,- հայտարարել է նա: