Հետընթաց՝ Պոլսո պատրիարքի ընտրական գործընթացում. հայց է ներկայացվել՝ ընտրությունները դադարեցնելու պահանջով

Սեպտեմբերի 23-ին Թուրքիայի ներքին գործերի նախարարությունը Կ. Պոլսո պատրիարքարան էր ուղարկել պատրիարքի ընտրության վերաբերյալ կանոնագրությունը,  ըստ որի՝ ընտրությանը մասնակցելու իրավունք ունեին միայն Պոլսո պատրիարքարանի երկու եպիսկոպոսները՝ տեղապահ Սահակ Մաշալյանն ու Արամ Աթեշյանը: Նախկինում ընտրություններին մասնակցում էին նաև այն եպիսկոպոսները, որոնք կա՛մ ծնունդով, կա՛մ էլ ծնողների կողմից Թուրքիայից էին: Իսկ այս կանոնադրությամբ այլ թեկնածուները, մասնավորապես՝ Գուգարաց թեմի առաջնորդ Սեպուհ արքեպիսկոպոս Չուլջյանը և Գերմանիայի թեմի առաջնորդ Գարեգին արքեպիսկոպոս Բեքչյանը, հնարավորություն չստացան մասնակցելու ընտրությանը:

85-րդ պատրիարքի ընտրությունները կազմակերպող Նախաձեռնարկ մարմինը որոշել էր չբողոքարկել որոշումը: Սակայն հայկական համայնքից մի խումբ քաղաքացիներ հայց են ներկայացրել՝ ընտրական գործընթացը դադարեցնելու և չեղյալ հայտարարելու պահանջով: Այս պահանջով հանդես են եկել «Հանրային նախաձեռնության» անդամները: