Արամ Աթեշյանը` կրկին Պոլսո հայոց պատրիարքի փոխանորդ. նոր զարգացումներ

Պոլսի հայոց պատրիարքարանը հայտարարություն է տարածել օրեր առաջ ստացած` Ստամբուլի նահանգապետարանի նամակի հիման վրա, որում նշվում էր, որ թուրքական պետությունը չի ճանաչում արքեպիսկոպոս Բեքչյանի ընտրությունը Պոլսի Հայոց պատրիարքի պաշտոնում:

Պոլսի հայոց պատրիարքարանի պաշտոնական կայքէջից տեղեկանում ենք, որ թուրքական իշխանությունների և հայ համայնքի ներկայացուցիչների հանդիպման արդյունքում որոշվել է վերադառնալ 2010 թվականի կարգավիճակին, երբ թուրքական իշխանությունների կողմից պատրիարքի փոխանորդ էր նշանակվել Արամ արքեպիսկոպոս Աթեշյանը:

Ստացվում է, որ այսուհետ Պոլսի հայոց պատրիարքի պարտականությունները կշարունակի կատարել Արամ Աթեշյանը:

Ուշագրավ է, որ պատրիարքարանի հայտարարության մեջ մասնավորապես նշվել է այն փաստը, որ Գարեգին արքեպիսկոպոս Բեքչյանը  Սահակ եպիսկոպոս Մաշալյանին բանավոր կերպով հայտնել է իր` հրաժարական տալու մտադրության մասին, և ենթադրվում է, որ նա հենց այդ պատճառով չի մասնակցել վերոհիշյալ նիստին: