Կերպարվեստի թանգարան, առողջարան. վարչապետը Վանաձորում ծանոթացել է զարգացման ծրագրերին

Վարչապետ Նիկոլ Փաշինյանը տիկնոջ՝ Աննա Հակոբյանի հետ այսօր այցելել է Վանաձոր՝ մասնակցելու քաղաքի օրվան նվիրված տոնական միջոցառումներին և ծանոթանալու քաղաքի զարգացման ծրագրերին. Yerkir.am-ին հայտնում են ՀՀ կառավարության լրատվական ծառայությունից:

Վարչապետի առաջին կանգառը Վանաձորի Կառլոս Աբովյանի անվան կերպարվեստի թանգարանն է եղել, որտեղ իրականացվում են վերակառուցման աշխատանքներ՝ ՀՀ կառավարության սուբվենցիոն ծրագրերի և Վանաձորի համայնքապետարանի համաֆինանսավորման շրջանակում։ Թանգարանի նորոգման համար նախատեսված գումարի ծավալը կազմում է 92 մլն դրամ։  Կառավարության ղեկավարը ծանոթացել է շինարարական աշխատանքների ընթացքին, որոնք, պատասխանատուների վստահեցմամբ, նախատեսվում է ավարտին հասցնել մինչև տարեվերջ։ Վանաձորի կերպարվեստի թանգարանը հիմնադրվել է 1974 թվականին, այն Լոռու մարզի կարևորագույն մշակութային օջախներից է, որտեղ ներկայացված է թե՜ դասական, թե՜ ժամանակակից հայ կերպարվեստը։ Թանգարանի ֆոնդերը ներառում են շուրջ 1800 թանգարանային նմուշներ՝ գեղանկարներ, գրաֆիկա, քանդակներ, դեկորատիվ-կիրառական արվեստ։ Թանգարանում ցուցադրված են ոչ միայն լոռեցի գեղանկարիչների ստեղծագործությունները։

Այնուհետև Նիկոլ Փաշինյանը և Աննա Հակոբյանն այցելել են «Վանաձոր Արմենիա» առողջարանային համալիր և ներկա գտնվել վերանորոգված բուժական մասնաշենքի բացման արարողությանը։ Շրջայցի ընթացքում վարչապետը ծանոթացել է ներդրումային ծրագրի շրջանակում իրականացված աշխատանքների արդյունքներին, առողջարանային ծառայությունների համար ստեղծված հնարավորություններին։ Նշվել է, որ 10 տարում նախատեսվում է ներդնել 5 միլիոն ԱՄՆ դոլար և վերակառուցել համալիրի բոլոր 9 մասնաշենքերը։ «Վանաձոր Արմենիա» առողջարանը հայտնի է որպես ցեխաբուժության կենտրոն՝ տորֆաբուժության բազմամյա ավանդույթներով։ Բացի ցեխաբուժությունից, այստեղ իրականացվում են ջրաբուժություն, պարաֆինաբուժություն և կլիմայաբուժություն։ Վերանորոգումից հետո, բացի բուժական սենյակներից, առողջարանն առաջարկում է նոր ստանդարտ, դելյուքս և լյուքս դասի ժամանակակից հյուրանոցային համարներ, առողջարանը բաց է լինելու տարվա բոլոր եղանակներին։

Ավելի ուշ, վարչապետը ելույթ ունեցավ տոնական գլխավոր միջոցառմանը:

Այսօր մենք Վանաձորը գտանք տոնական տրամադրության մեջ: Այս մասին Վանաձորի օրվան նվիրված տոնական գլխավոր միջոցառմանը հայտարարեց ՀՀ վարչապետ Նիկոլ Փաշինյանը:

«Նախեւառաջ, որ մենք իրար տեսնելու, ժպտալու հնարավորություն ունենք, իրարից մեր կարոտը առնելու հնարավորություն, որովհետեւ վաղուց չենք հանդիպել: Հաջորդը` այսօր քաղաքում տեղի են ունենում փոփոխություններ, տեսանք, որ վերանորոգվում է Կերպարվեստի թանգարանը, «Արցախ» պուրակը, այսօր տեղի կունենա այս հրաշալի շատրվանի բացումը, Վանաձոր բերող ճանապարհները վերանորոգվում եւ վերականգնվում են: Այս փոփոխությունները նոր հնարավորություններ են բերելու Վանաձորին»,- ասաց վարչապետը՝ նշելով, որ այս փոփոխությունները նոր հնարավորություն են բերելու վանաձորեցիներին:

«Վանաձորը յուրաքանչյուր քաղաքացու, յուրաքանչյուր հայի հայրենի քաղաքն է: Ամեն քաղաքի տոնին մենք ամբողջ հանրապետությունով պետք է հավաքվենք այդ քաղաքում` շնորհավորելու այդ քաղաքի տոնը: Մենք մեր տեղական սիրո սահմանները պիտի ընդլայնենք, վանաձորցին նույնքան պիտի սիրի Գյումրին, գյումրեցին նույնքան պիտի սիրի Արմավիրը, արմավիրցին նույնքան պիտի սիրի Իջեւանը եւ այդպես շարունակ․․․Որովհետեւ մենք չունենք հայրենիք` քուչա առ քուչա կիսելու, մենք ունենք մեկ միասնական հայրենիք, եւ Վանաձորը Հայաստանի Հանրապետության, Արցախի Հանրապետության յուրաքանչյուր քաղաքացու հայրենի քաղաքն է։

Շնորհավորում եմ մեր հայրենի քաղաքի տարեդարձը: Եվ ամենակարեւորը, դբա լավը ժողովուրդ ջան»,- եզրափակեց Փաշինյանը: