300-ից ավելի նկարներ՝ Արցախի կերպարվեստի թանգարանին

Այսօր Արցախի նախագահ Բակո Սահակյանն ընդունել է բարերար Արմեն Դավթյանին, որը նախագահին է նվիրել նկարիչ Մարտիրոս Ալագյանի վրձնած` Վաչագան Բարեպաշտ թագավորի դիմանկարը:

Ինչպես հայտնում են նախագահի աշխատակազմի տեղեկատվության գլխավոր վարչությունից, երկրի ղեկավարը երախտագիտություն է հայտնել բարերարին՝ ընդգծելով, որ Վաչագան Բարեպաշտի գործունեությունը եւ նրա թողած քաղաքական, իրավական ու մշակութային ժառանգությունը հայկական պետականության բաղկացուցիչ մասն է եւ պահանջում է ավելի խորը ուսումնասիրություն:

Նախագահը նաեւ նշել է, որ քննարկվում է Վաչագան Բարեպաշտի արձանը Արցախում կանգնեցնելու հարցը:

Բակո Սահակյանը Վաչագան Բարեպաշտի դիմանկարը փոխանցել է Արցախի կերպարվեստի թանգարանին:

Ի դեպ, օրերս թանգարանին են փոխանցվել Մինասի, Սարյանի, Մոգիլեւսկու, Շևչենկոյի եւ աշխարհահռչակ այլ նկարիչների` 300-ից ավելի ստեղծագործություններ: Երեկ ԼՂՀ մշակույթի եւ երիտասարդության հարցերի նախարարությունում տեղի է ունեցել կտավների հանձնման-ընդունման արարողությունը: