ՏԵՍԱՆՅՈՒԹ. Հրշեջ-փրկարար է մահացել Բազումի անտառի հրդեհը մարելիս

Բազումի լեռնաշղթայի անտառներում առաջացած խոշոր հրդեհը մարելիս 2 հրշեջ-փրկարար այրվածքներ են ստացել, որոնցից մեկը մահացել է, իսկ մյուսին տեղափոխում են Վանաձորի հիվանդանոց: shamshyan.com-ը հայտնում է, որ մահացածը Գուգարքի հրշեջ-փրկարարական ջոկատի հրշեջ-փրկարար, փրկարար ծառայության սերժանտ, 22-ամյա Սամվել Վարդանի Դևելյանն է, վիրավորն էլ նույն հրշեջ-փրկարարական ջոկատի հրշեջ-փրկարար, փրկարար ծառայության սերժանտ Էդգար Իշխանի Գրիգորյանը: 

Էդգար Գրիգորյանի վիճակը շարունակում է  մնալ ծայրահեղ ծանր` Yerkir.am-ին հայտնեց Երեւանի Ճառագայթային բժշկության և այրվածքների հանրապետական գիտական կենտրոնի բուժական գծով փոխտնօրեն Կարինե Բաբայանը:

Նա ասաց, որ 28-ամյա հրշեջի մարմնի 40 տոկոսն է այրվել, վերին շնչուղիների` 10 տոկոսը:

Հրդեհի վայր է ժամանել Արտակարգ իրավիճակների նախարար Ֆելիքս Ցոլակյանը, որը կապ է հաստատել Առողջապահության նախարար Արսեն Թորոսյանի հետ և Երևանից սանավիացիայի ուղղաթիռը թռել է Վանաձոր, որպեսզի վիրավոր հրշեջ-փրկարարին տեղափոխեն Երևան:

Նրա կարգադրությամբ հրդեհի վայր են ժամանում նաև Երևանից հատուկ փրկարարական ջոկատի հրշեջ փրկարարները։

Հրդեհի վայրում հավաքվածները ֆոտոլրագրողին ասել են, որ մահացած հրշեջը Ապրիլյան քառօրյայի օրերին միշտ եղել է առաջնագծում։