Մենք այստեղ ենք, որպեսզի փրկենք ձեզ. թուրքական բանակին աջակցող «Սիրիայի ազատ բանակ» խմբավորումը՝ Սիրիայի խաղաղ բնակիչներին

«Սիրիայի ազատ բանակ» զինված խմբավորումը, որը մարտական գործողություններ է իրականացնում Սիրիայի կառավարության դեմ և ներկայումս աջակցում է թուրքական բանակին, երեկ քրդական Էլ Յաբսե գյուղում է եղել. հայտնում է En Son Haber կայքը:

Խմբավորման անդամները վստահեցրել են խաղաղ բնակիչներին, որ իրենք «կմաքրեն տարածաշրջանն ահաբեկիչներից, և խաղաղ բնակչությունը կշարունակի անվտանգ ապրել»:

Խմբավորման ջոկատներից մեկի ղեկավարը մասնավորապես ասել է. «Հանգիստ եղե՛ք: Մենք ձեր ընտանիքն ու ձեր ժողովուրդն ենք: Մենք այստեղ ենք, որպեսզի պաշտպանենք ձեզ: Որպես սիրիացի ժողովուրդ՝ մենք թույլ չենք տա , որ մեր պետության կառույցում լինի անջատողական ահաբեկչական կազմակերպություն: Հավատը պատկանում է Աստծուն, իսկ հայրենիքը՝ բոլորիս: Խնդրում եմ ձեզ՝ աղոթել մեզ համար»:

Հիշեցնենք, որ «Սիրիական ազատ բանակ» խմբավորումը ստեղծվել է 2011 թվականին մի խումբ սիրիացի դասալիք սպաների կողմից:

Հոկտեմբերի 9-ին Թուրքիան սկսել է «Խաղաղության ակունք» ռազմական գործողությունը Սիրիայի հյուսիսում՝ բազմաթիվ զրահատեխնիկա և օդուժ կիրառելով սահմանի երկայնքով: Թուրքիայի բանակին աջակցում է «Սիրիայի ազատ բանակ» զինված խմբավորումը: