Բանակն էլ ենք մենք զրոյական կետից սկսել կառուցել, մենք 30 տարի բանակ չենք ունեցել. Անուշ Բեղլոյան

Ստացվում է՝ բանակն էլ ենք մենք զրոյական կետից սկսել կառուցել, մենք 30 տարի բանակ չենք ունեցել․ լրագրողների հետ զրույցում ասաց իմքայլական պատգամավոր Անուշ Բեղլոյանը:

«Մենք բանակ ենք ունեցել, որի մարտունակությունն ավելի բարձր է գնահատվել նախկին իշխանության կողմից, քան փորձը ցույց տվեց»,- հայտարարեց պատգամավորը՝ ավելացնելով, որ Արցախը ռազմական պարտության հետևանքով որոշ մասը կորցրեց:

Դիտարկմանը, թե եթե վատ բանակ էր այս իշխանությունը ժառանգել, ինչո՞ւ էր այս իշխանության պաշտպանության նախարարը հայտարարում՝ «նոր պատերազմ, նոր տարածքներ», Բեղլոյանը նախ հետաքրքրվեց՝ ո՞ր նախարարն է ասել, տեղեկանալուց հետո ասաց. «Արդյո՞ք այդ նախարարն այլևս նախարար է»: Իսկ թե ինչո՞ւ նախարար չէ, պատասխանեց՝ «կառավարության որոշման ձևակերպմամբ»:

Նորից անդրադառնալով բանակի թեմային՝ իմքայլական պատգամավորն ասաց. Ես չեմ ասում, որ բանակը մարտունակ չէ, ես ասել եմ, որ մենք բանակ ենք ժառանգել, որը մրցունակ չէր Ադրբեջանի և Թուրքիայի ժամանակակից սպառազինության դեպքում»: