Քաբուլում տեղի ունեցած պայթյունը երկրի նախագահի ընտրությունների նախապատրաստումը վիժեցնելու փորձ է. Աֆղանստանի վարչապետ

Աֆղանստանի վարչապետ Աբդուլա Աբդուլան այսօր` օգոստոսի 7-ին, դատապարտել է Քաբուլի արևմուտքում ոստիկանական տեղամասի մոտ իրականացված պայթյունը`այն որակելով որպես երկրի նախագահի ընտրությունների նախապատրաստումը վիժեցնելու փորձ, հայտնում է ՏԱՍՍ գործակալությունը:

«Ես վճռականորեն դատապարտում եմ այսօրվա ահաբեկչական գրոհը Քաբուլում, ահաբեկիչները նպատակ էին հետապնդում խանգարել նախագահական ընտրարշավի անցկացմանը»,- իր թվիթերյան միկրոբլոգում գրառում է կատարել Աբդուլան:

Ավելի վաղ տեղեկացրել էինք,որ պայթուցիկներով լի ավտոմոբիլն օգոստոսի 7-ի առավոտյան պայթել էր Քաբուլի արևմտյան շրջանի ոստիկանական տեղամասի տարածքում, ինչի հետևանքով տուժել է 95 մարդ: Պայթյունի պատասխանատվությունը ստանձնել է «Թալիբան» ահաբեկչական խմբավորումը: 

Աֆղանստանի նախագահական ընտրությունները պլանավորված են 2019 թվականի սեպտեմբերի 28-ին: Դրանց անցկացման ամսաթիվը, սակայն, հետաձգվել է մի քանի անգամ:

Ավելի վաղ նախատեսվում էր, որ ընտրությունները կկայանան այս տարվա հուլիսի 20-ին: Երկրի պետության ղեկավարն ընտրվում է համընդհանուր, գաղտնի և ուղղակի քվեարկության հիման վրա հինգ տարի ժամկետով և կարող է վերընտրվել երկրորդ ժամկետում: