Լավրովն ակնարկել է, որ ԱՄՆ-ը կապ ունի վրացական խորհրդարանում սադրանքի հետ

Մոսկվան մտավախություն ունի, որ Վաշինգտոնը փորձում է խանգարել ՌԴ-Վրաստան հարաբերությունների կարգավորմանը: Այդ մասին հայտարարել է ՌԴ ԱԳ նախարար Սերգեյ Լավրովը. հայտնում է ТАСС-ը: Նրա խոսքով` այդ կարգավորումն ակնհայտ էր վերջին տարիներին:

Լավրովը նշել է, որ որոշ վերլուծաբաններ ուշադրություն են դարձրել այն հանգամանքին, որ վրացական խորհրդարանում տեղի ունեցած սադրանքից մի քանի օր առաջ Թբիլիսիում այցով եղել  է Ջո Բայդենի անվան հիմնադրամի ղեկավարը և ակտիվորեն աշխատել ոչ միայն կուլուարներում, այլև հանդես է եկել հրապարակայնորեն և կոչ արել չտարվել ՌԴ-ի հետ հարաբերությունների զարգացմամբ:

«Ուստի այդ տեսակետը նույնպես չի կարելի բացառել»,- հավելել է ՌԴ ԱԳ նախարարը: