46 համարի երթուղայինի կարգազանց վարորդը կհեռացվի աշխատանքից

Երևանի հասարակական տրանսպորտի 46 համարի երթուղայինի վարորդը, որը երթուղայինը վարելու ընթացքում ծխել էր, այնուհետև վեճի բռնվել ուղևորներից մեկի հետ, կհեռացվի  աշխատանքից: «Ֆեյսբուք»-ի իր էջում այս մասին գրառում է կատարել Երևանի քաղաքապետի մամուլի խոսնակ Հակոբ Կարապետյանը: 

«Նախօրեին տարածված տեսանյութում արձանագրված՝ 46 համարի երթուղու վարորդի վարքագիծը քննարկելու համար այսօր Երերւանի քաղաքապետարանի տրանսպորտի վարչություն է հրավիրվել երթուղին սպասարկող ընկերության ներկայացուցիչը:

Քննարկման արդյունքում որոշում է կայացվել կարգազանց վարորդին հեռացնել աշխատանքից:

Ուղեւորափոխադրող ընկերության ներկայացուցիչներին քաղաքապետարանում հորդորել են աշխատանքներ տանել երթուղու վարորդների հետ՝ խստիվ պահպանել ուղեւորների հետ շփման վարքականոնը, ինչպես նաեւ ավելի ուշադիր լինել Ճանապարհային երթեւեկության կանոնները պահպանելու հարցում:

Ուզում եմ նշել նաեւ, որ առհասարակ վարորդների վարքագծի հետ կապված խնդիրները գործող տրանսպորտային համակարգի պայմաններում լուծել, ըստ էության, հնարավոր չէ: Հարցի խորքային լուծումը կտրվի այն ժամանակ, երբ ուղեւորները կօգտվեն հարմարավետ ու արժանապատիվ տրանսպորտից, իսկ վարորդը կաշխատի նորմալ պայմաններում, պարզ ասած, վարձատրությունը կախված չի լինի ուղեւորների քանակից: 
Այս ամենն իրագործելու համար քաղաքապետարանը ներկայումս ինտենսիվ աշխատանք է տանում՝ տրանսպորտի նոր ցանցը հնարավորինս շուտ գործարկելու ուղղությամբ»,- գրել է Կարապետյանը:

«Ֆեյսբուք»-ի օգտատերեր Անի Խաչատրյանը տեսանյութ էր հրապարակել՝ ահազանգելով, որ 46 համարի երթուղայինի վարորդներից մեկը վարելու ընթացքում ծխել է, չի ենթարկվել ծխախոտը հանգցնելու կոչերին, վեճի է բռնվել ուղևորի հետ: