Ինքնաբուխ այս ակցիան վկայեց՝ ազգային արժեքների, Արցախի վերաբերյալ անբարոյական ձևակերպումներով խոսքը տեղ չունի մեր հասարակությունում. Գեղամ Մանուկյան

«Երկիր մեդիա» հեռուստաընկերության լրատվական և հասարակական-քաղաքական հաղորդումների տնօրեն, ՀՅԴ անդամ Գեղամ Մանուկյանն այսօր ներկայացել է ոստիկանության Կենտրոնի բաժին՝ բացատրություն տալու ՀԱԿ ակտիվիստ Վարդան Հարությունյանին ծեծի ենթարկելու մասին։ Դաշնակցական գործչի օրինակին ինքնաբուխ հետևեցին այլ քաղաքացիներ ևս՝ ներկայանալով ոստիկանություն և հայտնելով, որ իրենք են ծեծի ենթարկել ակտիվիստին։

Ոստիկանությանը ներկայանալուց հետո Գեղամ Մանուկյանը լրագրողների հետ զրույցում ասաց,  որ անցնող 2-3 ժամերի ընթացքում տարբեր քաղաքական հայացքներ ունեցող մարդկանցից բազմաթիվ հեռախոսազանգեր ու գրություններ է ստացել, և միայն կուսակցական ընկերները չեն, որ ներկայացել են ոստիկանության բաժին:

«Սա այն բանի վկայությունն է, որ նաև հանրությունն է հասկանում, որ մեր ազգային արժեքների, ավանդույթների, Արցախի վերաբերյալ նման անբարոյական ձևակերպումներով խոսքը տեղ չունի, թոռնիկի ներկայությամբ պապիկի վրա հարձակումը տեղ չունի, այն ինչին ականատես եղանք մի քանի օր առաջ»:

Գեղամ Մանուկյանը նշեց՝ ակցիան կուսակցական քայլ չէր, այլ քայլ էր, որպեսզի հանրությանը ցույց տան, որ չի կարելի այլևս հանդուրժել այն անթույլատրելի թշնամանքը, ատելության խոսքը, որն այսօր տարածված է սոցիալական ցանցերում, սոցիալական ցանցերի միջոցով նաև լրատվամիջոցներում: Պետք է այս ամենը դադարեցվի: 

Հարցին, թե Վարդան Հարությունյանն ի՞նչ աղերսներ ունի վերոշարադրյալի հետ, Գեղամ Մանուկյանը հորդորեց՝  կարդալ նրա մի քանի գրառումները. «Երբ մի երիտասարդ կարող է «թուրք» կոչել արցախցուն, Պարգև Սրբազանին վերջին գռեհիկ բառերն ասի... ասում ենք խոսքի ազատություն, բայց հո չենք ասում... Ես առիթ եմ ունեցել իրենց կազմակերպիչներից Ջիվան Աբրահամյանին ասել՝ թող ներողություն խնդրի: Բազմաթիվ փորձեր են արվել, հիմա չասեմ...»:

Հարցին, այս ակցիայով ծեծն են արդարացնում, չէ՞ որ խուլիգանություն է տեղի ունեցել, Գեղամ Մանուկյանը հակադարձեց. «Դուք քննի՞չ եք: Դուք արդեն հոդված եք ներկայացնում: Ամիսներ շարունակ է այդ տղային փորձ արվել բացատրել...  ձևակերպումները, որ օգտագործում է այդ տղան, նույնիսկ թուրքը չի ձևակերպում»:

Լրագրողների դիտարկմանը, թե Հրանտ Մարգարյանի հետ կապված միջադեպի մասով քրեական գործի հարուցումը, ըստ ոստիկանության, մերժվել է` հանցակազմ չլինելու պատճառով, Գեղամ Մանուկյանը նշեց, որ ոչ թե մերժվել է քրեական գործի հարուցումը, այլ Հրանտ Մարգարյանը մեծահոգաբար բողոք չի ներկայացրել ոստիկանություն, և բողոքի բացակայության պատճառով գործ չի հարուցվել:

Անդրադառնալով միջադեպի մասնակիցներից բերման ենթարկված Յուրա Հովհաննիսյանին՝ Գեղամ Մանուկյանն ընդգծեց. «Նա մեր շատ լավ երիտասարդներից է: Եվ ի տարբերություն շատ շատերի, որոնք հրապարակներում կամ սոցիալական ցանցերում գլուխ են գովում, թե Ապրիլյան պատերազմի ժամանակ մասնակցություն են ունեցել, Յուրան դաշնակցական այն երիտասարդներից է, ով ապրիլի 2-ին կամավորագրվել է, և իրականացրել մարտական հերթապահություն առաջնագծում»:

Տեղեկացնենք՝ Յուրա Հովհաննիսյանն ազատ է արձակվել Կենտրոնի ոստիկանությունից, նրա նկատմամբ խափանման միջոց է ընտրվել չհեռանալու ստորագրությունը: