Սորոսը ֆինանսավորում է պետականության հիմքերը քանդող բոլոր նախագծերը. Մալյանն ակցիա է իրականացրել Համալիրի տարածքում

Փորձում էի տեղեկացնել, որ Ջորջ Սորոսը ֆինանսավորում է պետականության հիմքերը քանդող բոլոր նախագծերը: Այսպես մեկնաբանեց հասարակական գործիչ Նարեկ Մալյանն իր` Մարզահամերգային համալիրի դիմաց իրականացրած «հակասորոսական» ակցիան:

Հավելենք, որ նա ակցիան իրականացրել է հենց այն ժամանակ, երբ համալիրում  ընթանում էր Եվրասիական միջկառավարական խորհրդի նիստը:

Լրագրողների հետ զրույցում Մալյանը նշեց, որ ինքն այդ կերպ դաշնակից երկրների ղեկավարներին փորձել է տեղյակ պահել, որ մեծ վտանգ գոյություն ունի՝ հանձինս Ջորջ Սորոսի և նրա հիմնադրամների: «Փորձում էի տեղեկացնել, որ Ջորջ Սորոսը ֆինանսավորում է պետականության հիմքերը քանդող բոլոր նախագծերը։ Նրա կողմից ֆինանսավորված նախագծերի հետևանքով թուլանում է պետությունը, և ի վերջո, պետականությունը կարող է խարխրվել», - շեշտեց նա` հավելելով, որ անգամ մի քանի ցուցանակներ էր պատրաստել պետությունների մայրենի լեզուներով։

Ոստիկանները Մալյանին թույլ չեն տվել մոտենալ Մարզահամերգային համալիրին, ինչի հետևանքով էլ նա «իրազեկումն իրականացրել է  աստիճանների վրա»:

Մալյանը հավաստիացնում է` ինքը շարունակելու է իրազեկման գործընթացը` տեղեկացնելով մարդկանց, որ պետականությունը կորցնելու ու պետական ինստիտուտների կործանման մեծ վտանգ գոյություն ունի: