Ո՛չ Կարապետյանների հետ կապ ունեմ, ո՛չ Վանեցյանի. Բաղրամյանն՝ իր առաջադրման մասին

Հանրային ծառայությունները կարգավորող հանձնաժողովի նախագահի պաշտոնում առաջադրված Գարեգին Բաղրամյանն անհիմն է համարում խոսակցությունները, թե իր թեկնածության առաջադրման հիմքում ռուսական հետք կա: Այսօր լրագրողների հետ զրույցում նա նշեց, որ եթե, ռուսական հետք ասելով, ակնարկում են «Տաշիր» ընկերության սեփականատեր, ռուսաստանաբնակ մեծահարուստ Սամվել Կարապետյանին, ապա նրան մոտիկից անգամ չի տեսել:

«Իսկ Կարեն Կարապետյանի հետ էլ շփվել եմ մի քանի անգամ, աշխատանքային հարցեր ենք քննարկել, և դա այն ժամանակ, երբ նա վարչապետ էր: Միասին քննարկումների ենք մասնակցել»,- ասաց նա:

Հարցին` իսկ ի՞նչ կասի ԱԱԾ տնօրեն Արթուր Վանեցյանի աջակցության մասին, Բաղրամյանը պատասխանեց. «Որ բաջանաղ ենք, այո, բաջանաղ ենք։ Բայց Վանեցյանը, եթե չեմ սխալվում, 18 տարուց ավելի աշխատում է ազգային անվտանգությունում, ես՝ 18-20 տարի էներգահամակարգում։ Վստահեցնում եմ ձեզ՝ ոչ ես եմ օգնել Արթուր Վանեցյանին` նշանակվելու այս կամ այն պաշտոնին, ոչ նա՝ ինձ»: