80 փոխանակման կետ կփակվի, 500 մարդ էլ գործազուրկ կդառնա․ Արամայիս Խաչատրյան

««Պետական տուրքի մասին»  օրենքում փոփոխություններ ու լրացումներ անելու մասին» օրեսդրական փաթեթն այսօր ԱԺ մշտական հանձնաժողովներում էր: Պատգամավորներն ու նիստին հրավիրյալ շահառուները քննարկում էին առաջարկված նոր հարկային կարգավորումները, որոնք վերաբերում են գրավատներին և տարադրամի փոխանակման կետերին: Ըստ դրանց` պետական տուրքը վերոնշյալ հաստատությունների համար ավելանելու է 60-ապատիկ անգամ:

Քննարկման մասնակից` Արժութային դիլերների միության նախագահ Արամայիս Խաչատրյանն ասաց, որ փոխանակման կետերը իրենց միության անդամ են, իսկ այդ կետերի համար պետական տուրքի բարձրացման որոշումը շահառու կողմերի հետ նախապես չի քննարկվել:

«Մինչդեռ, եթե լինեին նման քննարկումներ,  կնշեինք այն գործիքակազմը, որն անհրաժեշտ է ոլորտի վերահսկման և խախտումների բացառման համար, բայց կառավարությունը որոշել է գնալ պետական տուրքն ավելացնելու ճանապարհով։ Փոխանակման կետերի համար, օրինակ, եթե մեկ անգամ անդորրագիր չտրամադրեն, սահմանված տուգանքի համաձայն՝ 4 միլիոն դրամ պետք է վճարեն»,- ասաց նա:

Ըստ Խաչատրյանի` պետական տուրքը 60 անգամ ավելացնելու պարագայում 230 փոխանակման կետերից 80-ը կփակվի, մոտ 500 մարդ գործազուրկ կդառնա, իսկ մնացած 20 տոկոսի 10 տոկոսը կկարողանա այդ 3 մլն դրամ տուրքը վճարել ընդամենը մեկ տարի։