Վրաստանը կարգելի՞ իր տարածքով ցորենի և ալյուրի ավտոտրանսպորտային ներկրումը. այս պահին գնահատվում են քաղաքական ռիսկերը

Անցած տարվա  սեպտեմբերի 15-ից Թբիլիսին որոշել էր արգելք սահմանել ավտոտրանսպորտային միջոցներով ցորեն կամ ցորենի ալյուր ներկրելու կամ արտահանելու համար, սակայն ավելի ուշ որոշվեց ավտոտրանսպորտային միջոցներով ցորենի և ալյուրի ներմուծում-արտահանումը հնարավոր դարձնել` իրականացնել ևս մեկ տարի։

Երևան-Թբիլիսի տեսակամրջի ընթացքում այդ թեմային անդրադարձավ Հայաստանում Վրաստանի առաջին դեսպան Գիգլա Բարամիձեն: «Սա այնքան բարդ հարց է, որ կառավարությունը չգնաց դրա լուծմանը: Այս պահին աշխատում են այս խնդրի լուծման վրա, բայց ես չեմ կարծում, թե այսօր մենք պատրաստ ենք դրան: Կառավարությունն այսօր պատրաստ չէ ասել, թե որ ուղղությամբ կզարգանա այս ծրագիրը՝ և՛ Փոթի նավահանգստի՞, և՛ Լարսի՞, թե՞ միայն ծովային ճանապարհով: Գնահատվում են ռիսկերը, և դա ոչ այնքան տնտեսական, որքան քաղաքական խնդիր է, որովհետև միանգամից հարց է առաջանում՝ ինչո՞ւ է դա արվում, ո՞ւմ համար է դա արվում»,- ընդգծեց նա: