Ալիևը Դավոսում օգտագործեց ընդդիմության ցույցերը՝ ցույց տալու համար, թե կա ներքին ճնշում, չի կարող փոխզիջման գնալ ԼՂ հարցում. Էլիբեգովա

Ադրբեջանում ընդդիմությունը գնալու է ակտիվացման, ժողովրդավարացման, երկրի իշխանությունները դեռ փորձում են ցույց տալ, թե գնում են երկխոսության, սակայն եթե իրավիճակը դուրս գա վերահսկողությունից, ապա կլինեն տասնյակ ձերբակալվածներ, արմատական ճնշումներ կգործադրվեն: Այս մասին լրագրողների հետ հանդիպման ժամանակ ասաց ադրբեջանագետ Անժելա Էլիբեգովան: 

«Այս պահի դրությամբ Ալիևը ընդդիմության ցույցերը շատ լավ կարողանում է օգտագործել` ի շահ իրեն: Օրինակ՝ հունվարի 19-ին ցույց եղավ, որը թույլատրված էր և բազմահազարանոց, ի դեպ, հնչեցին բավականին ռադիկալ մտքեր Արցախյան հարցի կարգավորման շուրջ, թե իշխանությունները շատ փափուկ են հայկական կողմի հետ: Մի քանի օրից Ալիևը գնաց Դավոս և դա օգտագործեց՝ ցույց տալով, թե իր վրա ներքին ճնշում կա, ուստի չի կարող շատ փոխզիջումների գնալ: Իսկ արդեն ամսի 20-ին, երբ ընդդիմությունն ուզում էր ցույց անել, ինչպես նաև դրանից հետո, թույլ չէին տալիս: Այսինքն՝ ընդդիմության հետ երկխոսությունը իմիտացիա է, հստակ երևույթ չէ»,- ընդգծեց ադրբեջանագետը: