Ատելության քարոզը երբեք լուծում չի կարող լինել. Գասպար Կարապետյան

Yerkir.am-ը  ավելի վաղ տեղեկացրել էր, որ 2019 թվականի մարտի 6-ին, ՀՅԴ Եվրոպայի Հայ Դատի հանձնախմբի նախաձեռությամբ, Եվրոպական խորհրդարանում անցկացվել է «Արմենոֆոբիա. պատմական և ներկա վերածնունդ» խորագրով գիտաժողովը:

Միջոցառման ընթացքում  ՀՅԴ Եվրոպայի Հայ Դատի հանձնախմբի նախագահ Գասպար Կարապետյանը ողջունել է մասնակիցներին` ընդգծելով արմենոֆոբիա հիմնախնդրի քննարկման կարևորությունը Եվրոպական խորհրդարանում: «Ատելության քարոզը երբեք լուծում չի կարող լինել: ԵԽ-ի համապատասխան մարմինները, մասնավորապես` ԵԽ մարդու իրավունքերի հատուկ ներկայացուցիչը պիտի քաջալերեն Թուրքիային և Ադրբեջանին` դադարեցնել հակահայկական դիրքորոշումներ քարոզելու քաղաքականությունը»,- ասել է նա:

Խոսելով Ադրբեջանում հայատյացության մասին` լեհ պատմաբան, պրոֆեսոր Յակուբ  Օշիեցկին շեշտել է, որ որոշ գիտնականներ համարում են, որ արմենոֆոբիայի երևույթը կապված է 20-րդ դարում Լեռնային Ղարաբաղի հակամարտության երևան գալու հետ, սակայն նա պնդում է, որ «արմենոֆոբ վարքագիծը  ձևավորվել է դեռևս 19-րդ դարում, և դա ապացուցված է այդ ժամանակների շատ եվրոպացի պատմաբանների կողմից»:

Միջոցառմանը մասնակցել է նաև ռուս և իսրայելցի հայտնի բլոգեր Ալեքսանդր Լապշինը: Նա երկար ժամանակ հետապնդվում էր ադրբեջանական իշխանությունների կողմից: Լապշինը ներկայացրել է իր սեփական փորձը և նշել. «Ես մի շարք զուգահեռներ են տեսնում ժամանակակից Ադրբեջանի և Երկրորդ Համաշխարհային պատերազմի սկզբի նացիստական Գերմանիայի միջև: Այսօր հայերի նկատմամբ ուղղված ատելության քարոզչությունը Ադրբեջանի քաղաքականության հիմքն է»,- ասել է նա:

Գիտաժողովում ելույթ են ունեցել նաև ԱԽ ԱԺ նախագահ Աշոտ Ղուլյանը,  թուրք գործիչ Ռագըփ Զարաքոլուն և Արցախի Հանրապետության ՄԻՊ Արտակ Բեգլարյանը: