Շվեյցարիայի ազգային բանկը ներկայացրել է Եվրոպայի ամենաթանկարժեք թղթադրամը

Շվեյցարիայի ազգային բանկը ներկայացրել է նոր նմուշի 1000 ֆրանկանոց թղթադրամը, որը կդառնա Եվրոպայի ամենաթանկ թղթադրամը և արժեքով երկրորդն աշխարհում` Բրունեյի 10 հազար դոլարանոց թղթադրամից հետո: Այս մասին հայտնում է 24-my.info-ն:

Թղթադրամը, որը շրջանառության մեջ կմտնի մարտի 13-ից, մանուշակագույն է՝ պոլիմերային մանրաթելերի օգտագործմամբ, ինչպեսև իններորդ սերիայի մյուս նոր թղթադրամները։ Դիզայնի հիմնական թեման հաղորդակցությունն ու լեզուն են։

Վերջին ժամանակաշրջանում աշխարհում նկատվում է շրջանառությունից առանձնապես խոշոր թղթադրամները հանելու միտում, քանի որ դրանք ակտիվորեն օգտագործվում են ոչ միայն քրեական աշխարհում, այլև էլեկտրոնային վճարումների տարածման համատեքստում։ Մասնավորապես` 2019 թվականի ապրիլից Եվրոպական կենտրոնական բանկը  որոշում է կայացրել այլևս չտպագրել 500 եվրոյանոց թղթադրամներ:

«Այնուամենայնիվ, Շվեյցարիայում, մշակութային առանձնահատկությունների բերումով, կանխիկ դրամը նախկինի պես տարածված է»,- նշել է Շվեյցարիայի ազգային բանկի փոխնախագահ Ֆրից Ցուրբրյուգը։

Բանկի` 2017 թվականի հարցման արդյունքները ցույց են տալիս, որ բոլոր վճարումների մոտ 70 տոկոսը Շվեյցարիայում իրականացվել է կանխիկ դրամով։ Արժեքային արտահայտմամբ` այդ ցուցանիշը կազմել է մոտ 45 տոկոս։ Հարցվածների մոտ 40 տոկոսը գոնե մեկ անգամ տարվա ընթացքում գնումների համար վճարել է 1000 ֆրանկանոց թղթադրամով։ Իտալախոս Տիչինո կանտոնում այդ ցուցանիշը հասնում է 60 տոկոսի, գլխավորապես՝ ի հաշիվ 55-ից բարձր տարիքի բնակչության։

Հավելենք, որ շվեյցարական ֆրանկների փոխարինումը նոր նմուշի թղթադրամներով կավարտվի 2019 թվականի սեպտեմբերին, երբ ԿԲ-ն կներկայացնի 100 ֆրանկ անվանական արժեքով վերջին թղթադրամը։