«Գազպրոմ» ընկերության հետ պայմանավորվել ենք գազի ներքին սակագնի պահպանման մասին. Փաշինյան

ՀՀ վարչապետ Նիկոլ Փաշինյանը Դավոսում РИА Новости-ի հետ զրույցում հայտնել է, որ երկրի իշխանությունները «Գազպրոմ» ընկերության հետ պայմանավորվել են գազի ներքին սակագնի պահպանման մասին:

««Գազպրոմ»-ը գազը վաճառում է ոչ թե Հայաստանին, այլ «Գազպրոմ Արմենիա»-ին, այդ պատճառով մեր դերը միջնորդավորված է: Բայց մենք պայմանավորվել ենք «Գազպրոմ Արմենիա»-ի հետ, որ երկրի ներսում գազի գինը չի փոխվի»,- ասել է ՀՀ վարչապետը:

Ըստ նրա` հայկական կողմը վերջնական համաձայնության գալու նպատակով շարունակելու է «Գազպրոմ»-ի հետ բանակցությունները:

«Ներկայումս ԵԱՏՄ  շրջանակում ընթանում է գազի և էներգետիկայի ընդհանուր շուկաների ստեղծման հարցի քննարկումը, ինչը նշանակում է, որ մենք քննարկելու շատ թեմաներ ունենք»,-նշել է Փաշինյանը: