ՊԵԿ-ի 128 աշխատակից ազատվել է աշխատանքից

ՊԵԿ-ի 128 աշխատակից ազատվել է աշխատանքից, և սա դեռ սկիզբն է: Այս մասին լրագրողների հետ հանդիպման ժամանակ ասաց ՊԵԿ նախագահ Դավիթ Անանյանը:

Նա նշեց, որ կրճատումները կառուցվածքային փոփոխությունների արդյունք են:

Անանյանի հավաստմամբ` դեռևս հոկտեմբեր ամսին տեսչական հսկողություն իրականացնող շուրջ 7 վարչությունների աշխատակիցներ` 580 մարդ, ստացել էին կառուցվածքային փոփոխությունների կատարման և, դրանցով պայմանավորված, հնարավոր կրճատումների վերաբերյալ ծանուցում:

«Ծանուցման ժամկետն ավարտվում էր դեկտեմբերի 22-ին, սակայն մենք երկարաձգեցինք դրա կատարումը, որպեսզի այն իրականացվի տոներից հետո: Յուրաքանչյուր աշխատակցի վերաբերյալ կայացվել է կոլեգիալ որոշում, և ավելի քան 2 ամսվա ընթացքում գնահատվել են այդ աշխատակիցների կարողությունները: Ցավոք, շատ դեպքերում ընտրությունը կատարել ենք լավի և լավագույնի միջև: Չի կարելի ասել, որ այդ 128 աշխատակիցներն արժանի էին կրճատման, ուղղակի մենք ստիպված նման քայլի ենք գնացել` կապված  գործառույթների վերակազմակերպման հետ և կառուցվածքային փոփոխությունների տրամաբանության շրջանակներում»,- ասաց Անանյանը: