ԱԳՆ կենտրոնական ապարատում փոփոխությունների մասին տեղեկություն չունեմ. ԱԳՆ խոսնակ

Դիվանագիտական ծառայությունը մշտապես փոփոխվող կառույց է, լինում են ռոտացիաներ, խոսքը մասնավորապես դեսպանների ռոտացիայի մասին է, սակայն ԱԳՆ կենտրոնական ապարատում փոփոխությունների մասին տեղեկատվություն չկա: Այս մասին լրագրողների հետ ճեպազրույցում ասաց ՀՀ արտաքին գործերի նախարարության մամուլի խոսնակ Աննա Նաղդալյանը՝ անդրադառնալով մամուլի հրապարակմանը և նշելով, թե  «հետաքրքիր է` ովքեր են այդ աղբյուրները»:

«Երբեմն այնպիսի տեղեկատվություն է տարածվում, որին տեղյակ չենք, և մենք էլ ենք զարմանում՝ արդյո՞ք ԱԳՆ-ում նման բան կա, թե՞ չկա: Ուստի եթե բացահայտվեն աղբյուրները, մենք էլ կիմանանք՝ որտեղից իրենց այդ ինֆորմացիան»,- նշեց նա:  

Հիշեցնենք, որ, «Հրապարակ» օրաթերթի տեղեկություններով, ԱԳՆ-ում փոփոխություններ են սպաս­վում, մասնավորապես` փոխարտգործնախարար Շավարշ Քոչարյանը թոշակի է անցնելու և հնարավոր է նախարարի խորհրդական նշանա­կվի: Իսկ ԱԳ փոխնախարար կնշանակվի Շվեդիայում և Ֆինլանդիայում դեսպան Արտակ Ապիտոնյանը, որը 2009-2013 թթ. եղել է ՀՀ նախագահի արտաքին կապերի վարչության պետը:

Ինչ վերաբերում է ԱԳ նախարարի տեղակալ Կարեն Նազարյանի` Վատիկանում ՀՀ դեսպան նշանակվելու մասին տեղեկությանը, Աննա Նաղդալյանը պատասխանեց. «Դեսպանների փոփոխումը՝ հետկանչը, նշանակումը բնականոն բնույթ է կրում նախարարությունում: Դեսպանների նշանակման կարգը տեղի է ունենում ՀՀ Սահմանադրության հիման վրա և «Դիվանագիտական ծառայության մասին» օրենքի շրջանակներում: Մինչև գործընթացի ավարտը մենք դեսպանների մասին նշանակման վերաբերյալ որևէ մեկնաբանություն հրապարակային չենք տալիս՝  ելնելով կոռեկտության սկզբունքից»: