Ես անձամբ նման տեղեկություն չունեմ. ՀԱՊԿ միացյալ շտաբի պետը՝ Նախիջևանում թուրքական բազայի ստեղծման մասին

Այսօր Մոսկվա-Երևան-Մինսկ-Բիշքեկ-Աստանա տեսակամրջի ընթացքում ՀԱՊԿ միացյալ շտաբի պետ, գեներալ-գնդապետ Անատոլի Սիդորովն իր ներածական խոսքում ասաց, որ Բելգիայի, Նիդերլանդների, Թուրքիայի, Գերմանիայի, Իտալիայի ավիաբազաներում, այսօրվա դրությամբ, պահվում է նախորդ սերնդի 200 միավոր չկառավարվող ավիառումբ, այսինքն՝ դրանք ավիաբազաներում պահվում են 10, 15, 20 տարի:

Երևանյան տաղավարից հնչած մտահոգությանը և հիշեցմանը, թե Թուրքիան վերջին շրջանում ակտիվություն է դրսևորում Նախիջևանի ուղղությամբ, Սիդորովը արձագանքեց. «Ես չեմ ասում, որ Թուրքիան ներկա դրությամբ ինչ-որ ագրեսիվ քաղաքականություն է նախապատրաստում Հարավային Կովկասում, հատկապես` Հայաստանի նկատմամբ»:

Yerkir.am-ի հակադարձմանը՝ կան տեղեկություններ, որ Թուրքիան պատրաստվում է, որպես ՀՀ-ում ռուսական ռազմաբազայի հակակշիռ, Նախիջևանում երրորդ բազան ստեղծել,  ՀԱՊԿ միացյալ շտաբի պետը պատասխանեց. «Ես անձամբ նման տեղեկություն չունեմ»:

Հիշեցնենք՝ վերջերս ԳԱԱ արևելագիտության ինստիտուտի տնօրեն Ռուբեն Սաֆրաստյանը հայտարարել էր, որ Թուրքիան նախապատրաստվում է իր սահմաններից դուրս՝ Նախիջևանում,  ստեղծել իր երրորդ ռազմաբազան: «Օգտվելով այն հանգամանքից,  որ ՌԴ-ն ունի իր կարիքը Սիրիայում, Թուրքիան փորձում է իր ոտքի տեղը մի քիչ ընդլայնել և ուժեղացնել իր ներկայությունը Նախիջևանում, այդ թվում՝ ռազմական առումով: Սա աշխարհաքաղաքական կարևոր գործընթաց է, և չեմ կարծում, որ այն ռուսների կողմից լուրջ հակազդեցության չի արժանանա, քանի որ սա առաջին հերթին արվում է ՀՀ-ում ռուսական ռազմաբազայի գոյությանը հակակշռելու նպատակով»,- նշել էր նա:

Իր հերթին, քաղաքագետ Ալեքսանդր Մանասյանը լրացրել էր, թե «այդ ռազմաբազայով Թուրքիան մեծացնում է իր ռազմական ներկայությունը, և սա անում է ՌԴ-ի հետ իրենց սիրախաղերի պահին, որ Ռուսաստանը չխոսի, քանի որ ներկայում Ռուսաստանը շահագրգռված է Թուրքիային պոկել արևմտյան աշխարհից»: