Նմանատիպ կառույցի մասին տեղեկություն չունեմ. Արմեն Գևորգյանը՝ 2008-ին գաղտնի շտաբի անդամ լինելու մասին

Վերաքննիչ դատարանում քննվում է 2008-ի մարտի 1-ին Ազգային անվտանգության խորհրդի քարտուղար, նախկին փոխվարչապետ, նախագահի աշխատակազմի նախկին ղեկավար Արմեն Գևորգյանին կալանավորելու միջնորդությունը մերժելու դեմ գլխավոր դատախազության վերաքննիչ բողոքը:

Նախքան դատական նիստի մեկնարկը` Արմեն Գևորգյանը լրագրողների հետ զրույցում ասաց, որ նախորդ ասածներին ավելացնելու ոչինչ չունի, իսկ անհրաժեշտ տեղեկություններն իր պաշտպանները կհայտնեն:

Հարցին՝ մամուլում տեղեկություններ եղան, որ Դուք  2008-ի մարտի 1-ի դեպքերի ժամանակ գաղտնի շտաբի անդամ եք եղել, որտեղ որոշումներն են կայացվել, արդյո՞ք դա համապատասխանում է իրականությանը, Արմեն Գևորգյանը պատասխանեց. «Ես մամուլի հրապարակումները չմեկնաբանելու սովորություն ունեմ: Ով հրապարակել է, նրանից էլ հարցրեք»:

Հակադարձմանը՝  Դուք եղե՞լ եք այդ շտաբի անդամ, նա արձագանքեց. «Ես նմանատիպ կառույցի մասին տեղեկություն չունեմ»:

Գևորգյանը հարկ համարեց ընդգծել՝ գործը քննվում է դատարանում և երբ ավարտվի, բոլոր անհրաժեշտ պարզաբանումներն ու տեղեկություններն իր փաստաբանները կհայտնեն:

«Այս պահի դրությամբ իմ նախորդ ասածներին որևէ բան չունեմ ավելացնելու կամ դրանցից պակասեցնելու: Ինձ հաջողություն մաղթեք, լա՞վ»,- ասաց նա: