Նոր Նորքի «Հայաթ հոթել»-ում կատարված սպանության գործով կա ձերբակալված

«Հայաթ հոթել»-ում Անժելա Իսրայելյանի սպանության գործով ձերբակալվել է Երևանի Գայի պողոտայի բնակիչ Արթուր Նաջարյանը, որը սպանության օրը վնասվածքներ էր ստացել: Այս մասին հայտնում է Shamshyan.com-ը։ 

Ա․ Նաջարյանի նկատմամբ քրեական գործ է հարուցվել ՀՀ քր օր-ի 104 հոդվածի 1-ին մասի և 235 հոդվածի 1-ին մասի հատկանիշներով:

Քննչական մարմինը տեղեկություններ է ստացել, որ Ա. Իսրայելյանն ու Ա. Նաջարյանը գտնվել են քաղաքացիական ամուսնության մեջ եւ միասին բնակվել նշված հոթելի համարներից մեկում: Դեկտեմբերի 8-ին նրանք վիճաբանել են, հոթելի մատուցողուհի Մ. Ե.-ն դուրս է եկել և փորձել օգնություն խնդրել, և այդ ժամանակ ներսում կրակոցների ձայներ են լսվել:

Հիշեցնենք, որ դեկտեմբերի 8-ին՝ գիշերը ժամը 04:00-ի սահմաններում, Նոր Նորք վարչական շրջանի Գայի պողոտա 33 հասցեում գործող «Հայաթ հոթելում» հնչել են կրակոցներ, այնուհետեւ նույն հոթելում հայտնաբերվել է Գայի պողոտայի բնակիչ, 33-ամյա Անժելա Իսրայելյանի դին՝ հրազենային վնասվածքով։