Քոչարյանի երկու որդիները ծառայել են Երևանում, ոչ մի գիշեր չեն անցկացրել որևէ զորամասում. Փաշինյան

ՀՀ վարչապետի պաշտոնակատար Նիկոլ Փաշինյանը փաստաթղթեր է ուզել ՀՀ երկրորդ նախագահ Ռոբերտ Քոչարյանի տղաների ծառայության վերաբերյալ մանրամասները ճշտելու համար: Ճամբարակում «Իմ քայլի» քարոզարշավի ժամանակ նա նշեց, որ իր ձեռքի տակ կան փաստաթղթեր, որոնք հետաքրքիր փաստերի մասին են խոսում:

«Ասում են` նախընտրական շահարկում է, էժան շահարկում է, Ռոբերտ Քոչարյանի որդիները ծառայել են: Սակայն ես պաշտոնական տեղեկանք եմ ուզել Քոչարյանի որդիների ծառայության վերաբերյալ, և հիմա պաշտոնապես ասում եմ` Քոչարյանի  երկու որդիները ծառայել են Երևանում, ոչ մի գիշեր չեն անցկացրել որևէ զորամասում: Նրանք ծառայել են պաշտպանության նախարարության վարչական մասում: Որդիներից մեկն էլ ձևակերպված է եղել որպես վարորդ. պետական ավտոն դրել են տակը` որտեղ ուզել, գնացել է` պետության բենզինի հաշվին: Էդ ինչո՞ւ եք այդպես ոգևորվել»,- ասաց Փաշինյանը:

Նա նշեց, որ եթե ինքն ինչ-որ բան է ասում, գիտի, թե ինչ է ասում, և եթե որևէ մեկն իր ասածը կասկածի տակ դնի, փաստերով ու փաստաթղթերով կապացուցի: