Միջուկային գործարքը բարդ պայմաններում է հայտնվել. Իրանի ԱԳՆ տեղակալը զգուշացնում է

Իրանի հետ Միջուկային համապարփակ համաձայնագիրը բարդ պայմաններում է հայտնվել: Պայմանագրով նախատեսված` Իրանի տնտեսական առավելությունները գրեթե զրոյի են հավասարվել, իսկ սա վտանգում է գործարքի ապագա ճակատագիրը: Այս մասին երեկ՝ նոյեմբերի 26-ին, Բրյուսելում կայացած Իրան-ԵՄ միջուկային խաղաղ գործակցության երրորդ խորհրդաժողովի ժամանակ հայտարարել է քաղաքական հարցերով Իրանի ԱԳՆ տեղակալ Աբբաս Արաղչին. տեղեկացնում է alikonline.ir-ը:

«ԱՄՆ պատժամիջոցների վերականգնումով, գրեթե զրոյի են հավասարվել պայմանագրով նախատեսված եւ պատժամիջոցների չեղարկման արդյունքում Իրանի տնտեսական առավելությունները»,- նշել է իրանցի բարձրաստիճան դիվանագետը՝ զգուշացնելով. «Իրականում, եթե Իրանը չկարողանա օգտվել Միջուկային գործարքով նախատեսված առավելություններից, ապա պայմանագրի պահպանումն անհնար կդառնա»:

Խոսելով Միջուկային գործարքի պահպանման կապակցությամբ ԵՄ-ի ձեռնարկած քայլերի մասին՝ Արաղչին նշել է, որ ԵՄ-ն քաղաքական ճիշտ ուղղություն է ընդունել, սակայն պակասում են դրա հետ կապված գործնական քայլերը: