Պոմպեոն կոչով դիմել է Պուտինին և Պորոշենկոյին

ԱՄՆ-ը կոչ է անում ՌԴ և Ուկրաինայի նախագահներ Վլադիմիր Պուտինին և Պյոտր Պորոշենկոյին` մասնակցել Կերչի նեղուցում իրավիճակի կարգավորման գործին: Այդ մասին ասվում է ԱՄՆ պետքարտուղար Մայք Պոմպեոյի հայտարարությունում. հայտնում է ТАСС-ը:

«Մենք կոչ ենք անում կողմերին` զսպվածություն ցուցաբերել և հետևել իրենց միջազգային պարտավորություններին ու պարտականություններին: Մենք կոչ ենք անում նախագահ Պորոշենկոյին և Պուտինին` մասնակցել իրավիճակի կարգավորմանը: Հաստատում ենք մեր աջակցությունը «նորմանդական քառյակ»-ի ձևաչափին»,- ասվում է հայտարարությունում:

Կիրակի ուկրաինական մի քանի նավեր հատել են ՌԴ-ի սահմանը: Դրանք մտել են ռուսական` ժամանակավորապես փակ ջրատարածք և չեն ենթարկվել ռուսական կողմի նախազգուշացումներին: Ռուսական կողմը կրակ է բացել, վիրավորվել է 3 ուկրաինացի զինվորական, նրանց բժշկական օգնություն են ցույց տվել, կյանքին սպառնացող վտանգ չկա: Նավերը ձերբակալվել են:

ՌԴ-ն քրեական գործ է հարուցել և ՄԱԿ-ի Անվտանգության խորհրդի շտապ նիստ հրավիրել Ազովի ծովում ստեղծված իրավիճակի հետ կապված: